QAACCESSA BARREEFFAMA XALAYAALEE WAAJJIRAALEE MOOTUMMAA, GODINA HARARGEE BAHAA, AANAA HARAMAAYAA

Abstract

Qorannoon kun Qaaccessa Barreeffama Xalayaalee Waajjiraalee Mootummaa Godina Harargee Bahaa Aanaa Haramaayaa irratti xiyyeeffata. Qorannoo kana gaggeessuuf qorannoo malleen makaatti dhimma bahaamtee jirti. Meeshaalee funaansa ragaalee qorannichaa sakatta’a barreeffamaa, afgaffii fi marii garee xiyyeeffannootti. Xalayaalee 36 waajjiraalee lamaan irraa sakatta’a barreeffamaan argamee fi afgaaffii hoggantootaa, itti aantootaa fi abbaa adeemsa hojiif taasisameen odeeffannoon argaman qaacceffamanii jiru. Hojjettoota Waajjiraalee Barnootaa fi Aadaaf Tuurizimii Aanaa Haramaayaa keessaa ragaa himtoota 8 filachuun mala iddatteessuu miti-carraa, iddatteessuu dhimmataatti fayyadamuun ragaaleen funanamaniiru. Ragaalee argame kanaanis barreeffamni xalayaalee rakkoolee kanneen akka sirna tuqaaleetti seeraan fayyadamuu dhabuu, seeraan qubeessuu dhabuu, qubguddeessa sirrii fayyadamuu dhabuu fi caasaa afaanii akkaataa seerri isaa ajajuun gargaaramuu dhabuudha. Sababni dogongoroota kanneenis hojjattoonni xiyyeeffannaa Afaanichaaf kennuu dhabuu, seerota afaanii beekuu dhabuu, leenjiin yeroo yeroon hojjettootaaf ogummaa barreessuu irratti kennamuu dhabuudha. Kanaafis yaada furmaataa kan ta’uu: qaamni dhimmi ilaalatu hundi seera barreeffama Afaan Oromoo fi saayinsii barreeffamaatiif xiyyeeffannoo kennuu, ogeessota afaanii waliin ta’uun leenjii hojii irraa yeroo yeroon kennuu, dandeettii barreessuu irra deddeebiidhaan shaakaluudha. Dabalees, moosaajiin (software) Afaan Oromootiin qophaa’ee itti dhimma bahuun guddina Afaan Oromoof gahee olaanaa qaba.