QAACCESSA SIRBA LAKKOO HAALA RAAWWII GAA’ILA OROMOO ITUU AANAA HABROO KEESSATTI

Abstract

Qorannoon kun Qaaccessa Ergaafi Qabiyyee Sirba Lakkoo Oromoo Ituu Godina Haragee Lixaa Aanaa Habroo ibsuu irratti xiyyeeffata. Kanumaan walqabatee hanga ammaatti qoran noon qaaccessa sirba lakkoo raawwii gaa’ela Oromoo Ituu Aanaa Habroo keessatti gaggeeffame hin jiru. Bu’uuruma kanaan, kaayyoon gooroo qorannichaa sirboota Lakkoo haala raawwii Gaa’ila Oromoo Ituu Aanaa Habroo keessatti xiinxaluun hiika itti kennuu yoo ta’u, gaaffileen qorannichaas yoomessa sirboota lakkoo Oromoo Ituu maal akka tahan, qabiyyeewwan sirboota lakkoo, Ergaawwan sirboota lakkoo Ormoo Ituu maal akka tahan kaayyoowwan gooree waliin walitti hidhachuun deebii argataniiru. Haalma kanaan qorannon ergaafi qabiyyee sirba lakkoo Oromoo Ituurratti gaggeeffame waan hinjirreef naannawa kanatti qorannoo gageesuun barbaachisaa dha. Mata duree kanaan walqabatee yaadoleefi kitaabileen wabii garagaraa sakatta’amuun qorannicha kan utabanidha. Qorannichis ergaafi qabiyyee sirba lakkoo Aanaa Habroo keessaa ganda 3 irratti kan xiyyeeffate yoo ta’u, maddi ragaalee qorannichaa madda ragaa tokkoffaafi madda ragaa lammaffaati. Madda ragaa tokkoffaa manguddootaafi hawwan gandoota ibsaniifi ekispartoota Waajjira Aadaafi Turiizimii aanichaati. Kana malees maddi ragaalee lammaffaa barruuleefi kitaabota adda addaa irraa argamaniiru. Malli iddattoo miti carraa kaayyoofi darbaa dabarsaa kan dhimma itti bahaman yoo ta’u, meshaaleen funaansa ragaalee afgaaffiifi marii gareefi daawwannaan dhimma bahamaniiru. Ragaaleen funanamanis mala qorannoo akkamtaafi ibsaatiin galumsa aadaa hawaasaa keessatti xiinxalamaniiru. Sirbi lakkoo weedduwwan shaggooyyee, dhiichisaa, heelleefi heellamaa kan ofkeessaa qabu yoo ta’u dhimmoota bohaarsuuf, seenaa, faarsuuf,arrabsuu, barsiisuufi qabeenyaa ibsa.Sirba lakkoo Oromoo Ituu Aanaa Habroo eenyummaa, duudhaafi aadaa hawaasichaa kallattiinis ta’ee alkallattiin gadifageenyaan kan ibsanidha. Beektonni Oromoo Biirooleen Aadaafi Turizimii, Biiroon Barnootaa, barsiistonniifi qooddattoonni biroo duudhaa kanarratti daran qorannoo bal’aa gaggeessuun beeekkkumsa hawaasaa giddisuu qabu